അവാര്‍ഡ്‌ ലഭിച്ച ശ്രീ. ചെന്നിത്തല ചെല്ലപ്പന്‍പിള്ളക്ക് നല്‍കുന്ന മംഗളോപഹാരം
ഭാവം തിങ്ങിത്തിളങ്ങും കഥകളി നഭസ്സിൽ ശാരദേന്ദു സമാനം!
നൂനം ശോഭിക്കുമെന്നും നടന ചതുരനായെങ്ങുമെൻ “ചെന്നിത്തലേ”!
ഉന്നം തെറ്റാത്തൊരാംഗ്യം ചടുല ചലനവും ഭംഗിയേറുന്ന നാട്യം!
മിന്നും മുദ്രയ്ക്കിണങ്ങും നവരസമമൃതം തങ്ങിടുന്നർണ്ണവം നീ!
നൃത്തം ‚നൃത്യാദി നാട്യജ്ജലനിധിമഥനേ ലഭ്യമാം പീയുഷവും
ഒട്ടും ചോരാതെ നിത്യം നലമൊടുപരിചിൽ ശിഷ്യവൃന്ദത്തിനേകി
വിദ്യാദാഹം കെടുത്യോരിഹതവസവിധം തേടിവന്നോരവാർഡി–
ന്നൗന്നിത്യം പാർക്കിലാഹാ! വിധിമതമഖിലം പൂർവ്വജന്മാർജ്ജിതം താൻ!
ലോകം പ്രാർത്ഥിക്കയാലേ! ഗുരുകുലപതിയായ് സാർവ്വഭൗമൻ വരേണ്യൻ!
ഏകൻ ഗന്ധർവ്വശ്രേഷ്ഠൻ! കവിവരനതുലൻ‚ ജാതനായ് ചെന്നിത്തലെ.
നാകംപൂകീട്ടുപൂർവ്വൻ കലകളിലമരർക്കുമാചാര്യനായ് നടി-
ച്ചാകും മട്ടങ്ങുനിന്നിങ്ങഭയമരുളിടുന്നങ്ങിലാനന്ദപൂർവ്വം!
വർണ്ണിപ്പാനാർക്കുമാകാ‚ നടനകുശലനാം പൂർവജന്റക്രൂരനൗ–
വണ്ണംതന്നെയാണന്നം ബൃഹന്ദളവലലൻകാട്ടാള സാന്ദീപനീം!
എണ്ണപ്പെട്ടോരിവർക്കായ് പുനരപിജനനം നൽകിയോരാചാര്യനിന്നും
വർണ്ണം മങ്ങാതെനിൽപ്പൂ കലയുടെ സരസ്സിൽ പൂത്തോരിന്ദീവരം പോൽ!
ചാർത്തുന്നാപാദചൂഡം കലയുടെയലരാൽതീർത്തതാംഹാരമാര്യൻ!
തീർത്തും തന്നോളമെത്താൻ ചെറുമകനിലെഴും സ്നേഹവാത്സ്യല്യമാണി–
ക്കീർത്തിക്കൊക്കെത്തുടക്കം “നടനതിലകമേ”ഭാവുകം തന്നെ പാർത്താൽ!
പേർത്തും പൂജിക്കും ഹൃത്തിൽ കുലപതി ഗുരുവിൻ പാദപങ്കേരുഹങ്ങൾ!
തുംഗം ശ്രീരംഗമെന്നും നടനവിലസിതം “പാർവതീ” കേളീരംഗം!
പൊങ്ങും സ്നേഹാതിരേകസ്സുകൃതചഷകമാംതാവകം മാതൃഭാവം.
സാരം ഹാ! ത്വൽപ്രഭാവപ്രഭയതിൽ മുഴുകും ഭാഗ്യവാരാശിയാം നൽ
ഹീരം താനമ്മയത്രേ! അകമിഴിമിഴിപ്പാൻ മാർഗ്ഗദീപം തെളിച്ചോൾ!
നേരുന്നൂ മംഗളം തേ! ഭവതുചിരസുഖം വാഴ്ക നീണാൾ ഭവാനിൽ
ചേരുന്നീ കീർത്തിമുദ്രയ്ക്കുപമബതനഹീ നാട്യ രംഗത്തുവേറെ
സ്വാദിൽ നാട്യപ്രപഞ്ചം നവരസമിളിതം നേത്രയുഗ്മേ രചിക്കും
നീതന്നംഗുലിത്തുമ്പിൽ വിരിയുമിനി ശതം പത്മ മുദ്രാ ദളങ്ങൾ!
************************************************************************
ആശംസകള്‍
സ്നേഹപുരസ്സരം
ഡാന്‍സര്‍. ഓച്ചിറ ശങ്കരന്‍ കുട്ടി
ഓച്ചിറ
6-11-1991
ചെല്ലപ്പന്‍ പിള്ളയുടെ മുത്തച്ഛന്‍.)
(ശ്രീരംഗം: ചെല്ലപ്പന്‍ പിള്ളയുടെ ഭവനം.)
(“പാർവതീ” ശ്രീ. ചെന്നിത്തല കൊച്ചുപിള്ള പണിക്കരുടെ മകൾ,
ചെന്നിത്തല ചെല്ലപ്പൻ പിള്ളയുടെ മാതാവ് )
ആദ്യമായാണ് ഇങ്ങനെ ഒരു സംരംഭവുമായി ഒരു ബ്ലോഗ്‌ ഉള്ളത് കാണുന്നത്. നന്നായിരിക്കുന്നു.
ReplyDelete